يا واد يا دقدق يا مدقدق مالك كده زعلان
يلا قوم واصحى وفوق ده الواحد حيران
قالولى اسألو دقدق ده وحده الفهمان
عارف ليه كل مواطن فى بلدنا جعان؟
ليه كل موظف على مكتب كسلان؟
ليه الناس فى الشارع مش زى زمان؟
وتلاقى الواحد ماشى شحات غلبان؟
تعطف أو تديه لقمة يقول لأ ده أنا شبعاااان
وببيع العيش فى حارتنا كمان!!!
وابنى ضنايا نقاش أقصد فنان
خريج من طب الأسنان
وابنى التانى عيان
وعلاجه يوماتى بالمجان!!
دول خصخصوا شركة شعبان
ده جارى يا عينى الشقيان
ودستور معووج عدلوه!!ما فضلش غير بيت شعلان
وأخويا كلمنى فى التليفون يحكيلى عن بنته إيمان
وقال وياريته ما قال ده وكيلى ربى ودستورى القرآن
أخدوه ومرجعش من ليلة النصف من شعبان
وأدى عدت سنة والتانية وأهوه جه رمضان
وبناته وجماعته ما لهومش غير واد فلتان
طولت عليك معلش بس ده كلام مليان
ولا إيه ؟إيه ده؟ دقدق نايم نعسان
لأه ده باينه !!!! ميت غرقان
يارب حد يعرف يقرا حاجه لها قراءه خاصة
مش محتاجه أقول :تأليفى مفيش حد بيكتب بالشكل ده طبعا ولو فيه ما كنتش هفكرك آخد ده أصلا
هناك تعليق واحد:
السلام عليكم ورحمة الله ..
حسيت وأنا باقرأ هذه القصيدة إني باقرأ قصيدة من قصائد الانجليزي المترجمة حرفيا إلى العربية .. وده شيء كويس بالمناسبة لإن الشعر الانجليزي معروف عنه انه أغنى من الشعر العربي برغم ان اللغة العربية أغنى على المستوى اللغوي
فبعد ما باخلص القصيدة -لو سمنيناها قصيدة- باحس اني كنت قاعد اسمع حضرتك لمدة ساعة مثلا!!
أعتقد لو حررتي نفسك من القافية هترتاحي في الكتابة أكتر ..زي الشعر الانجليزي كده .. غيري القافية في تلات ابيات ورا بعض .. واضح ان عندك كلام كتير القافية بتلزمك بغيره أو كلام قريب منه.. على غرار
ABC
أو
ABA
وهاكزا
دي أول زيارة لمدونتك فعلا بس للأمانة حسيت فيها بروح عن مدونات كتير من اللي بتتكلم عن الأمور الجيدة والأمور الأفضل والأشخاص الذين كانوا كذلك ثم لم يعودوا كذلك ..
جزاكم الله خيرا لتقبلي حتى الآن ولي عودة
إرسال تعليق